Pathian hnena chawlhna!

Nizan dar 9:50 vel khan ka nu nuta neih chhun ka Pu Mawia chuan kum 78 mi niin chatuan ram min pansan ta a. Chutichuan, ka nute unau pasarih te zinga palite chu Pathian hnenah an lo chawl ta a, an unau zinga naupang ber ka nu leh ka nu Sangi shillong a mi chauh an dam ta. Unau pali kan ni a, state hran theuhah kan awm a, kan inngai em em mai a. Kan inphone reng mai a. ka nute unau hnih chauh awm tawh khawhar dan tur ka ngaihtuah hian ka lainat hle mai. Thla hmasa April 2, 2008 khan ka pa farnu neih chhun ka ni Lawmi'n South Vanlaiphaiah min boralsan tawh bawk a. Ani pawh kum 78 vel bawr tho a ni. Ka pate unau chu panga an ni thung a, ka pa nen pathum chu Pathian hnenah an chawl ve tawh bawk a ni. Ka ni leh ka pute ruang hi ka hmu hman lo ve ve a ni. Phai rama hnathawkte vanduaina pakhat chu hetiang hunah hian a ni. Hna avang leh kar hlat lutuk avangin a hawn ve zung zung theih loh a ni. A thla zawn zawna ka ni leh ka pute an kal ta mai hi a khawharthlak hle a ni. Zanin pawh ka mut a chhuak lova, Gospel hlate ka ngaithla a, ka tlaivar titih chu a ni ta mai a. Tuna ka ziak lai pawh hian Aizawl chu han phone ila inlengte zai thawm leh ka chhungte lusun tap thawm ka hre thei ngei ang. Engpawh ni se, ka pu a kal ta tih thu a fapa Pute Thlana, Missionary hnen atanga ka hriat veleh ka thianpa Dr.Andrew ka bula awm mek nen Pathian hnena tawngtaina tawite kan hmang a, he khawvela ka pu nun a lo hruaina zawng zawngah Pathian hnenah lawmthu kan sawi a, a hnenah chawlhna nuam taka awm reng tawh tura a hruai tak avangin lawmthu kan sawi bawk a. Ka pa Pathian hnena a chawlh hnu khan Pathianin ka nunah leh ka unaute nunah nasa takin hna a thawk a, min hruai nasa hle a ni tih tun hnuah ka hrechhuak a, ka pu tu leh fate pawh hian Pathian hruaina an chan nakin hnuah an la hrechhuak ve ngei ang.

Ka pu hi a zual tih kan hriat veleh kar hmasa May 21 khan Mumbai atangin ka nu in Aizawl lam panin a thlawk chho nghal a, a ni la lain a thleng a. Hemi ni hian ka nu bungraw excess avangin airport ah kan buai em em mai a, flight an miss lek lek a, Pathian khawngaihna azarah minute 15 vel a la awm tihin an lut thei ta a. An nuta neih chhun, an unau zinga upa ber ni bawk, chu a hmuh hman loh ka hlau em em mai a, a hmu hman mai pawh ni lovin Pathian thute an sawi ho hman a, riahchilhin a enkawl hman bawk a ni tih ka hriatin Pathian khawngaihna a nasain a ropui ka ti a. Ka nu hian ka pa kha khum beta a nat chhung zawng, kum hnih dawn lai, a kal ni thleng khan a enkawl a, zana a tlaivar zak zak chang a tam hle. Ka pa kal hnu lawk a Aizawl ka chhoh meuh kha chuan ka nu hriselna pawh a lo tla dawkin ka hria a.

Ka pa, F.K. Rohlira, kha slipped disk natna nia kan ngaih avanga hun rei tak khum beta a awm hnuin December 2001 khan Guwahati ah kan kalpui ta a, doctor te chuan in rawn kal tlai lutuk rei a daih tawh dawn lo, hruai hawng leh mai rawh u, min ti ta mai a. Thla thum aia a dam rei an ring tawh lova, nimahsela Pathian khawngaihna avangin August thla thleng chu min dampui leh ta a. Slipped disk awzawng a lo ni lova, chuap cancer a lo ni reng mai a, Aizawl lamah khan an lo detect ngai reng reng lo a lo ni. Zuk leh hmuam ti ngai reng reng lo, rawlthar tirh atang renga Pathian rawngbawl thin a ni a, chutiang natna a nei ta mai chu a mak pawh kan ti a, awih harsa pawh kan ti. Chumi tum Aizawl pan tura kan zinkawng tluka rei ka tih kha a la awm ngai lovang. Shillong ah ka nu u Nu Sangi te inah kan chawl chho phawt a. Ni khat a liam apiang khan rilru a mangang a ni ber mai.

Hun a liam beuh beuh a, JNU, Delhi a research kum tawpna a ni tawh bawk nen dissertation ziak turin ka chhuk leh ta phawt mai a. Mahse, hma ka sawn thei ta der lo mai a. Chutih laiin RBI hna dila ka exam naah ka tling a, interview tura kohna ka dawng ta a. Chumi lamah chuan ka rilru ka pe ta zawk a. A chang chuan hawn maite ka duh a, ka nu leh paten an remti der mai si lo va. Delhi ah ka awm laiin ka pa phei chuan phone ah min thlah fel der tawh a. Ka lo kal ta a nih pawhin Pathian hnenah ka chawl mai ang a, i rawn hawn buai pawh a ngai lovang. In unau lo inhmangaih ula, i nu hi duat takin lo enkawl ang che u, tiin phone ah min hrilh a. Mumang a ang duh hle thin. Kum 2002 a ka birthday zan chuan ka pa ka han phone leh a, phone ah min tawngtaisak turin ka ngen ta ngawt mai a. Ka thil ngenah chuan ka inchhir loh ber tum a ni.

Mumbai pana Delhi ka chhuahsan hma vel khan a zual a, ka u phei chuan i rawn hawn loh chuan i hmu hman lovang a ti thin. Ka nu ka rawn a, ani chuan i pain Mumbaia i hna zuk zawm zet la i rawn hawng dawn nia a ti, tiin min lo hrilh leh bawk si a. Mumbai panin ka kal ta a. August 5, 2002 a hna ka zawm zanin kan in ka han phone a, ka nu chuan i pa pawhin i hna zawm a hria a lawm hle mai, tiin min lo hrilh a. I pa hi i be duh em, mahse a chau deuh a, a ti a. Kei chuan chawl hahdam sela naktuk lamah ka rawn be mai ang, ka ti a. Nimahsela, khami tum khan hun kan kutah a awm lohzia ka hrechiang lehzual. A tuk zingah ka pa chu Pathianin a hnena awm tawh turin a lo hruai ta zawk a ni. A kal hmain ka nu leh unauten an kil laih a, fel takin an inthlah a ni. A kal hun tur a duhthusam ngei zing karah Pathianin a hruai ta a ni. Chu mai ni lovin Pathian pawhin hna ka zawm fel a hriat hma chu ka pa kha kan kiangah a la awmtir a ni. Pathian remruatna felzia chu a ropui teh e.

Ka pa kal ni hian tumahin min rawn be tlang thei si lova, mobile phone ka la nei lo bawk nen. Office lah a thar a ni bawk si a, department lah a lianin ka awmna chin an hre lo a ni ber mai. Chhunah thlahna hunserh te an lo hmang vek tawh a. Chutihlai te pawh chuan a kal chungchang ka la hriat loh thute an sawi a ni awm e. Hemi ni hian Aizawl hawn theih dan tur ngawt buaipuiin Administration lamah ka lo buai nileng a, Aizawl lam phone nachang pawh ka lo hre lo a ni. A zanah chuan office atanga ka hawn hnuin kan thian Liani te unau leh thiante Bible nen hian ka quarterah an rawn lut rup mai a. Maruat, hei prayer service te nei ho ila kan ti a, an ti mai a, ka lo lawm viau mai a. Ka insiam sawk sawk a. Rinloh takin inkhawmnaah chuan ka pa chungchang min hrilh ta mai a. Tlai lamah an hre tawh a, mahse office ah chuan min lo hrilh duh lo a lo ni a. Zana min hrilh atan an lo khek zawk a ni. Office chu ni sela hrilhhai takin ka awm dawn a ni a. Chumi tum chuan ka thiante ho kaltlanga a remruatna fel tak avangin Pathian hnenah lawmthu ka sawi a ni.

Ka pa khan Pathian hnena chawlh a lo chak tawh em em mai a. Naupang te a nih laiin a kaih vak tawh a, a mar an hmu zo tawh lova, chutihlai chuan ani chu hmun eng nuam em em mai pan hian a lo kal a, chu hmun a thlen hma chuan tuemaw hian a lo bia a, i kir leh a ngai, khulamah an la mamawh che a ni tiin a lo hrilh a. A hawi thlak chuan a ruang chuangah hian mi pakhat hi a lo tawngtai mek a zuk hmu thei a. A harh ta hlawl mai a. A lo puitlin chhoh hnu a Pathian pawlna a chan hnuah chu hmun nuam awmzia chu a hrechiang lehzual a, chutah chuan kal a thlahlel thin a ni. A kal hma pawh hian kan bialtu Pastor Khuma hnenah a damna tura tawngtai a phal tawh lo. Nang hi chuan ka damna turin mi tawngtai sak tawh lo la, Lalpa hnena kal ka duh tawh a ni a lo ti a. Delhi-a ka awm laiin chutiang chiah chuan min hrilh bawk a. Pate damna tura tawngtai theih loh tawp mai chu ka nuna ka thil commit hrehawm ber a la ni hial ang. A tan ka dilsak a, a damna erawh ka chham tel ngai ta lo a ni. Tunah chuan a rawng a lo bawl thin a Lalpa kiangah a chawl ta a, ka nite nen ka pute ho nen Beramno fakna hla mawi an sa ho ngei ang!

Ka pa hla duh em em mai, a sermon ka ngaihthlak hnuhnung ber 'Lalpa Lungawi Kum' a sawi tum pawha a thlan 'Mal Min Sawm Turin' tih hi kan sak apiangin ka pa ka hrechhuak thin a, pulpit tlanga mittui tla zawih zawih chunga Pathian hmangaihna a sawi thinte kha ka mitthla ah a la cham reng thin.

Mal min sawm turin,
Van khuaan ro a rel;
Eden kawngkhar an hawng leh ta,
Lut ru, Zion khua a var ta.

Lawm ru, lawm ru,
Min tlantu Beram No a lo kal;
Fak ru, Haleluia, Amen.
Haleluia! min tlan turin a lokal.

Zan hla mawi ri chuan,
Lei hi a nghawr nghing a;
Edena muhil an tho ta;
Khawi nge chhun Arsi chu an ti.

Lalberte Lalber,
Lei Zion roreltu;
Engtia awm thei nge mihringah,
A hmangaih a va mak em ve!

A fak hla nawn ru,
Van mipui seraf-ten;
Tuifinriat leh khawvel zawng hi,
Zaiin khat se, Haleluia.