Kan office thenawm lawk World Trade Centre Arcade ah hian Exhibition lian tham tak hi a awm reng thin a. Vawiinah pawh hian 4th Nutraceutical Summit an lo nei mek a. Exhibition lian tham tak mai, ni thum ngawt awh (Feb 21-23) a lo ni a. Damdawi lampangah pawh herbal atanga siam chhuah damdawi a tam hle. Ram hrang hrang atangin company hrang hrang represent in mi an rawn kal a, stall a rawn siam a. Stall pakhatah chuan inbukna niawm tak hi an lo chhawp a, ka mit a la ta riau a. Ka va pan hnaih chuan stall a awmte chuan i height check phawt la i rawn phei leh dawn nia, an ti a. A piah deuhah chuan ka san lam chu ka va check tir ve ngawt a. Chumi hnuah chuan an khawlah chuan ka inbuk ve ta a. Inbukna ngawt a lo ni awzawng lo mai a. Ka taksa bung hrang hrang rihna leh thau awm zat chu a rawn inher chhuah ta hem mai a.
An khawl hman chu Body Composition analyser a ni a. An khawl hmanga teh chuan ka taksa 81.6 kg a ritah chuan thau (fat mass) hi 17.5 kg a awm a, fat awm tur zat (5.6 - 20.0 kg) aiin kg khat leh a chanve in a tam zawk a ni awm e. Ka kut vei lam ke vei lam te chu ka kut leh ke dinglam te aiin an rit zawkin an thau zawk a ni tih an khawl chuan min hrilh lehnghal a. An khingpuite pawl phak ve turin engtianga han tihcher deuh zawk tur tak ni ang maw ka ti neuh neuh a. Ka taksa pumrua (trunk) ah phei chuan thau zaa 25 (a tam berah zaa 20 chu duhthusam a ni awm e) a awm a ni awm e. Thawk khat laia ka vawksa ei tam lutuk kha thauah a lo insiam tawh a ni ngei ang le. Vawksa hi chu a awm phawt chuan a tui si a, insum a har dawn bawk si a, chuvangin hetiang ang khawl hi chu hman fo chi a nih dawn loh hi ka ti rilru a.
Stall chu ka han bel chiang a, kha khawl kha an lo zuar reng reng lo mai a, herbal medicine - fitness & energy atana tha, nutrition lam te, personal care tihte an lo zuar zawk a lo ni a. Khawl kha chu a hmanrua atan chauh an lo hmang a lo ni. Visitors te kha an dinhmun an check sak hnuah a damdawi tur an lo chawh thin chu lo niin. Hmangchang an hre hle mai.
2 comments:
Ekhai, thau leh thaulo tehna khawl te pawh kan lo hmuh ve phah a, hotupa zarah a ropui thin e.. Thatchhiat hi thauna chikhat a ni phawt mai a. Hnathawh ngawr ngawr ni lovin, taksa sawizawi hi fit dan tha ber chikhat chu a ni phawtin ka hria. Dul hi a thang chak berin ka hre bawk a..hehehe
a tha phian asin..khalamah pawh tha tak tak a awm ngei ang..han en kual ve chhin teh :) nia, hei dul lamah tan lak a ngai ni awm tak a ni.he he
Post a Comment