Saturday, February 23, 2008

Taksa Thau Lam Tehna


Kan office thenawm lawk World Trade Centre Arcade ah hian Exhibition lian tham tak hi a awm reng thin a. Vawiinah pawh hian 4th Nutraceutical Summit an lo nei mek a. Exhibition lian tham tak mai, ni thum ngawt awh (Feb 21-23) a lo ni a. Damdawi lampangah pawh herbal atanga siam chhuah damdawi a tam hle. Ram hrang hrang atangin company hrang hrang represent in mi an rawn kal a, stall a rawn siam a. Stall pakhatah chuan inbukna niawm tak hi an lo chhawp a, ka mit a la ta riau a. Ka va pan hnaih chuan stall a awmte chuan i height check phawt la i rawn phei leh dawn nia, an ti a. A piah deuhah chuan ka san lam chu ka va check tir ve ngawt a. Chumi hnuah chuan an khawlah chuan ka inbuk ve ta a. Inbukna ngawt a lo ni awzawng lo mai a. Ka taksa bung hrang hrang rihna leh thau awm zat chu a rawn inher chhuah ta hem mai a.


An khawl hman chu Body Composition analyser a ni a. An khawl hmanga teh chuan ka taksa 81.6 kg a ritah chuan thau (fat mass) hi 17.5 kg a awm a, fat awm tur zat (5.6 - 20.0 kg) aiin kg khat leh a chanve in a tam zawk a ni awm e. Ka kut vei lam ke vei lam te chu ka kut leh ke dinglam te aiin an rit zawkin an thau zawk a ni tih an khawl chuan min hrilh lehnghal a. An khingpuite pawl phak ve turin engtianga han tihcher deuh zawk tur tak ni ang maw ka ti neuh neuh a. Ka taksa pumrua (trunk) ah phei chuan thau zaa 25 (a tam berah zaa 20 chu duhthusam a ni awm e) a awm a ni awm e. Thawk khat laia ka vawksa ei tam lutuk kha thauah a lo insiam tawh a ni ngei ang le. Vawksa hi chu a awm phawt chuan a tui si a, insum a har dawn bawk si a, chuvangin hetiang ang khawl hi chu hman fo chi a nih dawn loh hi ka ti rilru a.

Stall chu ka han bel chiang a, kha khawl kha an lo zuar reng reng lo mai a, herbal medicine - fitness & energy atana tha, nutrition lam te, personal care tihte an lo zuar zawk a lo ni a. Khawl kha chu a hmanrua atan chauh an lo hmang a lo ni. Visitors te kha an dinhmun an check sak hnuah a damdawi tur an lo chawh thin chu lo niin. Hmangchang an hre hle mai.

Monday, February 18, 2008

Kum Khat Dawn Lai Hnuah Mumbai Lamah

Kum nga lai mai ka lo awm tawhna hmun Mumbai lam panin December 14, 2007 (Friday) zanah Ahmedabad chhuahsanin ka nu nen, ka nau Awmawmi nen Lok Shakti Express trainin kan chhuak a. December 15, 2007 (Saturday) tuk zing dar 6 velah Bandra station kan thleng a. Lo chettlatna hlui a ni bawk a, hmanhmawh lo takin taxi pawh la vat lovin local train ah kan lut a. Mumbai chhim tawp lampang, Charni Road stationah kan chhuk a. Platform ah chuan thingpui leh chhang kan ei hnuin kan awmna thar tur Malabar Hill lam panin taxi in kan chhuak ta a. Mumbai khawpui nuam lai ber mai Marine drive leh a chhehvelte chu kan veng thenawm mai a ni a, nitina ka office kalkawng tur a ni.

Thui pawh kan kal hmain Malabar Hill chu kan thleng chho ta mai a, kan in thar tur pawh chu kan office thar chuan ka zawm hma hmain min lo tihfelsak diam a. Inchhung luah tlaka siamin phone nen an lo dah sa diam a, an chungah ka lawm hle mai. A hmun a nuamin a thengthaw tha hle mai a. Kawngpui atanga pen luh deuh a ngaih avangin motor khuin kan awmna hi a rawn chiah phak lo va. Boruak a thiang tha hle. Thenawm lawkah hospital a awm nghal bawk a, a remchang hle. Kan bul lawkah Raj Bhavan a awm a, Aizawl chu ni sela Tuikhuahtlang vel a ni awm mang e a, ka ti neuh neuh a. Engpawh ni se, kan zawlkhawpui nawmna chu a teha han tehkhin rual a ni hauh lovang. Helai hmun hi Mumbai khawpuiah pawh hmun man to ber lai a ni a. A hmaa Mumbai hmar lama kan awmna thin Goregaon nena khaikhin phei chuan chawhmeh man pawh a a to tha hle mai.

Chutih laiin bungraw thawn lamah harsatna a lo awm a. A tuk lawka thleng mai tura an sawi kan bungrua chu a rawn thleng thei ta mai lova, kan bungraw phurtute Universal Packers & Movers ho chungah ka lungawi lo hle. Mahse inchhung ah furniture a lo awm sa vek avang erawh chuan kan buai lem lova. Pawn lam atangin ei tur kan order mai thin a. Bungraw nghah avangin kan kawmchhak lawkah Biakin awm mah se, Chawlhniah pawh kan inkhawm thei ta lova.Awmawmi chu hna avanga Ahmedabad lama a let a hun tawh avangin a hawng leh ta a. Bungrua pawh chu zan lamah a rawn thleng ta chauh va. Hnam dang tihdanin ka han hau ve hrep a, an sawi apiang ka lo hnial a, kan buai hle mai. An thutiam an hlen loh rah leh ka thinrim rah a ni ber e. A hnu lama ka bungrua kan check leh phei chuan ka Titan sana, Minolta camera hlui, Reebok pheikhawk, etc. a lo bo nuaih mai a. Ka nuin misual khin a tha love a tih avangin police hnena FIR file ka tum pawh chu ka thulh leh ta a. Chuti deuh nuaih chuan Mumbai lamah kan pem lut leh ta a ni.

Office thar ka kai hmasak ber ni chu December 17, 2008 a nia. Ahmedabad lam atanga ka car a la rawn thlen loh avangin engtin nge ka kal ang aw tia in atanga ka chhuah laiin mi pathum kawt laia lo dingte chuan "Office lamah I kal dawn a mi? Rawn kal ve nghal mai rawh," an tia, an rual chuan ka kal ve ta nghal a. Heng mi pathumte hi Harish, Selva leh Biswas te an ni. Tun thleng hian Selva nen chuan kan la kal dun thin. Pa tha tak mai leh ringtu a ni a, zirtawpni tin hian a inah tawngtai inkhawm a ko thin. Tun khat chu ka tel ve nghe nghe a, guitar ka perh a, kan zai tui hle. A hnu lamah erawh chuan ka hawn tlai thin avangin ka tel hman ta lo. An HR Manager chu sipai bang a lo ni a, a lo efficient hle mai a. A ni khat chhungin formalities kan ti zo vek a. A tukah officer ho zawng zawng min introduce leh vek bawk a, ni khata mi ka chibai hnem ber tum niin ka hria.

Kan hna thawhna tharah hian Pu Davida, Mumbai atanga ka thian chhar leh Mumbai Mizo Inkhawmna leh Mumbai Mizo Associationa ka thawhpui tawh thin a awm bawk a. A lo thawk rei ve tawhin a nihna a lo sang ve tawh bawk a, a thlamuanthlak hle mai. Nimahsela, hmun khata thawk ho e ti lo chuan kan buai bawk nen, tum angin kan inhmu hman leh chuang lova. A hma lama ka awmna ngaihtuah chuan hna pawh a letin a tam a, hun pawh kan nei lo zawk a. Blogging leh Social networking atan chuan hun a awm lo hle a ni. Mahse, work culture chu ka duhzawng tak mai a ni thung. Nimin kha he hna thar ka zawm atanga thla hnih chiah a ni ve ta. Hun a lo kal chakin a la rei lo hle mai. Reference atana ka hman Pu Rinawma, IRS leh Pu Sangmama, IES te, min duhsaktu Pu Davida te leh Mumbai nu leh pate leh thian tha min tawngtaipuitute chungah ka lawm hle a ni.
Custom Search