Monday, April 28, 2008

Mizoram leh Italy Sumdawnna kawnga thawhho chungchang

[He thuziak hi April 25 a Mumbai Mizo website a ka ziak a ni a, Mizoram sawrkar leh Italy te sumdawnna kawnga inthlunzawm an tum tih news ah ka hmu a mizoram sawrkar lam leh mipuiten an hriat belh atana tha nia ka hriatte leh vei ve zawngte ka han tarlang ve vat a ni]

April 24, 2008 khan Italian Ambassador to India Pu Antonio Armelini chuan Mizoram Governor LT Gen (Retd) M M Lakhera leh Chief Minister Pu Zoramthanga te hmuin Mizoram leh Italy te sumdawnnaa khawnga inthlunzawm dan chungchang an sawi ho va. Pu Antonio Armelini hi a thawhpui Paolo Trichilo leh Bruno Camplia ten an rawn tawiawm a. Zee News in a tarlan dan chuan Mizoram governor Pu Lakhera hian Pu Armelini hnenah hian Mizoram thing leh mau hausakna te chu sawi hmawrhmuhin sumdawnnaa inthlunzawmna kawng khat a nih theih thu a hrilh a. Pu Antonio Armeilni hian Chief Minister hnenah Mizoram hi state ralmuang a nih avanga tlawh an chak thin thu a sawi a. A bikin horticulture tharchhuah thei lama thawh ho an duh thu a sawi bawk a ni. MIFCO in thei tui herna khawl Milan, Italy atanga Mizoram sorkarin a lei chungchangte pawh sawi langin inkawmna hun an hman thu DIPR website ah tarlan a ni nghe nghe.

Hetianga Italian Ambassador meuh insumdawn tawnna ngaihtuaha Mizorama a rawn kal vang vang mai hi ram hruaitute tan harh chhuah phahna ni sela a duhawm hle mai. Hei hi a bul tanna ah ngaiin kan ram hian engte hi nge ni nakin hnu lamah pawh chhum lo chat lova kan thawhchhuah theih ang a, engah te hian nge mi ramte aia kan chungnun theihna hi kan ngaihtuah a ngai tawh takzet a ni. European market phei chu tunlaiah sumdawnna kawnga inthlunzawmna kawngah phei chuan duhthusam a ni.

North-east hi thei chin nan ram dang mite hian an it em em mai a. Hmanniah meeting pakhatah Asian Development Bank Senior Project Economist, Dr. Hans Peter Brunner a hova inkawmna kan nei a. Dr.Brunner chuan entirna pakhat pein lakhuihthei hi North-east atang hian a chhuak lo a ni, heng angte hi tam takin thar thei sela chu, heng atang ringawt pawh hian sumdawnna lian tham a chhuak thei ngei ang tiin a sawi a. Ka han zawt chiang a, north-east hi an lo hre hneh hle a ni tih ka hriat phah a. Kan ram hi a zirin an zir a. Thil tha a chhuak thei a ni tih hengho hian an hre chiang em em a ni. Chu chu keini Mizote tan vanneihna a nih phah thei a ni. A hlawhtlinna erawh Mizoram rama roreltute leh Mizo mipuite kova innghat a ni.

Hmannia Centre for the Promotion of Imports from developing countries (CBI), the Netherlands in Mumbaia programme pakhat an huaihawtah chuan an consultant Mr.Staf Henderieckx chuan European Union ram nena indawr dawn chuan thu tiamah an din ngheh a ngai a. Tum khat an thutiama an din tawh loh chuan kan ring tawh ngai lo a ni. Chutiang bawkin keini pawhin sumdawnna kawnga in remsiamna kan neih chuan keni pawhin tihhlawhtlin ngei kan tum thin a ni a ti. A dawt lehah chuan quality products hi kan en a ni a ti a. Chu chu hre reng turin india rama sumdawng mi kalkhawmte chu a fuih nghe nghe. Italy ram te ang nena inkungkaihna kan neih dawn chuan Mizorama roreltute leh sumdawngte pawhin a tir atanga hriat atan a pawimawh ang.

A dawt lehah chuan Mizoram hian sumdawnna kawnga hlawhtlinna chanchin (success story) chhuan tham tur kan mamawh a ni. January thla khan Manipur Governor Dr.S.S.Siddhu Mumbaiah a rawn kal a, "Investment Opportunities in North East India" tih thupui hmangin north-east states pariat (Sikkim tiamin) ahte hlawkna uma kal turin sumdawng mite a fuih a. A bikin Mizoram chungchang sawiin Mizoram hi hmun ralmuang ber pawl a nih thu sawiin han tlawh chhuak ngei turin a chah bawk a. Sector pawimawh a sawite zingah horticulture lam pawh a sawi hmawrhmuh nghe nghe a ni. Chutih laiin ram dangte nena insumdawn tawnnna kawngah emaw, state dangte nen emawa supply chain mumal tak leh hlawhtling tak awm mekte entirna pek tur kan chham tlat niin a lang. Tun tum hi Mizoram tan success story kan ziah theihna hunah hmang thei ila chu nakin hnuah kan ram chanchin tlangzarha kan inzawrh a ngai lo vang a. Miten kan ram chanchin hriain min rawn pan tawh mai dawn a ni. Mizoramin an mamawh an pe thei dawn tih an hriat chuan India rama 'focus states' te zingah kan awm thuai ang a, khua rei hnuah phei chuan infrastructure lamah pawh a tul anga investment neih an hreh hauh lovang a, employment chungchanga kan state in harsatna a tawh mekte pawh nasa taka tihkiamin a awm ngei ang.

(April 25, 2008, Mumbai)
Custom Search